Ўш шаҳрида одамларни қурол билан қўрқитиб, қароқчиликда гумон қилинган йигитлар қўлга олинди. Бу ҳақда Ўш ШИИБнинг матбуот хизмати хабар бермоқда.
Маълум бўлишича, 2-август куни Ўш ШИИБга Коммунист овулининг Т.Ф. исмли фуқароси шикоят аризаси билан мурожаат қилган. Унинг сўзларига кўра, 1-август куни, тахминан соат 23:30 атрофида, Ўш шаҳридаги Қурманжан Датқа кўчаси билан Мўминов кўчасининг чорраҳасида 20 дан 25 ёшгача бўлган нотаниш шахслар унга травматик тўппонча билан таҳдид қилишган ва «Айфон 6» телефонини қўлидан тортиб олишган.
Суриштирув давомида жиноятга алоқадор дея гумонланган Қорасув туманида яшовчи 1998 йилда туғилган Б.Н ва К. ўғли Э. ҳибсга олинган. Б.Н бошқарувида бўлган «Жигули» русумли машинадан жабрланувчига Ф.Т.га қарашли «Айфон 6» русумли телефон топилди. Ушбу ҳолат бўйича Жиноят кодексининг 202-моддаси (қароқчилик ёки талончилик) бўйича судгача тергов бошланди. Ҳозирда уларнинг травматик тўппончаси бор ёки йўқлигини аниқлаш ишлари олиб борилмоқда. Қўлга олинганлар Ўш шаҳар ички ишлар бошқармасининг вақтинча сақлаш ҳибсхонасига олиб кетилган.
